-දුරකථනයෙන් ලැබුණු පැමිණිල්ලක් වුනත් අල්ලස් කොමිසම නියමෙට වැඩේ කරලා..
(ලංකා ඊ නිව්ස් -2025.ජුනි.26, පෙ.ව. 0.45) තඹුත්තේගම මහවැලි කලාපයේ ඉඩමක ගසක් කැපීම සඳහා බලපත්‍රයක් නිකුත් කිරීමට රුපියල් ලක්ෂයක අල්ලසක් ගැනීමේ චෝදනාවට වරදකරු වූ ඉඩම් නිලධාරියකුට කොළඹ මහාධිකරණ විනිසුරු සුජීව නිශ්ශංක ඊයේ (25) බරපතළ වැඩ සහිත වසර 22ක සිරදඬුවමක් සහ රුපියල් 30,000ක් දඩයක් නියම කළේය.
එම දඩ හා සිරදඬුවම්වලට අමතරව අල්ලස් පනතේ 26 වැනි වගන්තිය අනුව අල්ලස් ලෙස ගත් රුපියල් ලක්ෂයක මුදල දඩයක් ලෙස අයකර ගැනිමට නියෝග කෙරිණ. එය නොගෙවන්නේ නම් ලිහිල් වැඩ ඇතිව වසරක සිරදඬුවමක් ප්‍රධාන සිරදඬුවමට අමතරව ගෙවීයන පරිදි මහාධිකරණ විනිසුරුවරයා දඬුවම් නියම කළේය.
අපරාධ නඩු විධිවිධාන සංග්‍රහයේ 17 (4) වගන්තිය යටතේ අගතියට පත් ලීමෝල් හිමියාට රුපියල් ලක්ෂයක වන්දියක් ගෙවීමට අමතරව නියම විය.
මෙලෙස සිරදඬුවම් නියම වූයේ වී.එම්. කමල් මංජුල නැමැති 67 හැවිරිදි අනුරාධපුරයේ පදිංචි හිටපු වන ඉඩම් නිලධාරියකුටය. වරද සිදුකළ දිනට මාස 6කට පසු විත්තිකරු විශ්‍රාම යෑමට නියමිතව සිටියේය. දූෂණ චෝදනාවකට වරදකරු වීම නිසා දූෂිතයාට විශ්‍රාම වැටුප් හිමිකම ද අහිමි වේ.
මහවැලි කලාපවල පදිංචිකරුවන් ඔවුන්ගේ ඉඩම්වල පිහිටි ගස් කැපීමේදී කලාප කාර්යාලයෙන් බලපත්‍රයක් ලබාගත යුතුවේ. පැමිණිලිකරු එම ඉඩම්වල ගස් මිලදී ගෙන ඒවා කුට්ටි කර මොරටුව ප්‍රදේශයට ප්‍රවාහනය කිරීමේ ව්‍යාපාරයක් පවත්වාගෙන ගොස් ඇත.
ලීමෝල් හිමිකරු ඔහු මිලදී ගත් ගස් කැපීම සඳහා ප්‍රාදේශීය කාර්යාලයෙන් බලපත්‍රයක් ඉල්ලා සිටි විට විත්තිකරු එයට අනුමැතිය දීමට රුපියල් ලක්ෂයක අල්ලසක් ඉල්ලා තිබේ. ලීමෝල් හිමිකරු ඉන් රුපියල් 25,000ක මුදලක් දී ඇත. එවිට ඉඩම් හිමිකරු ගස් තුනක් කැපීම සඳහා පමණක් බලපත්‍ර නිකුත් කර ඉතිරි බලපත්‍ර නිකුත් කිරීමට රුපියල් 75,000 ක් ඉල්ලා තිබේ.
ලී මෝල් හිමිකරු මේ සම්බන්ධයෙන් අල්ලස් කොමිසමට දුරකතන ඇමතුමක් මඟින් පැමිණිල්ලක් දී ඇත. උපාය දූතයකු යොදවා විත්තිකරු අල්ලස් මුදල් ගන්නා අවස්ථාවේදී 2016 වසරේදී මාර්තු 18දා අත්අඩංගුවට ගෙන තිබේ. 2016 පැවරූ නඩුවක තීන්දුව ලැබුනේ 2025 දී හෙවත් වසර 9 කට පසුව වීම විශේෂත්වයකි.
විත්තිකරුට එරෙහිව අල්ලස් හෝ දූෂණ කොමිසම විසින් අල්ලසක් ඉල්ලා භාරගැනීම සහ එයට අනුබල දීම ඇතුළු වැරදි 6 කට අල්ලස් පනතේ 19 (අ) සහ (ඇ) වගන්ති යටතේ චෝදනා ගොනුකර තිබිණ.
විත්තිකරුට එරෙහි පැමිණිල්ල විසින් ඉදිරිපත් කර ඇති චෝදනා සාධාරණ සැකයෙන් තොරව සනාථ කර ඇති බව ප්‍රකාශ කළ මහාධිකරණ විනිසුරු සුජීව නිශ්ශංක මහතා දඬුවම් නියම කළේය.
පෙරියන්කුලම ප්‍රදේශයේ පදිංචි එච්. කරුණාරත්න නමැති ලීමෝල් හිමියකු විසින් මෙම පැමිණිල්ල කර තිබූ අතර ඔහුට බලපත්‍ර නිකුත් කිරීම ප්‍රතික්ෂේප කිරීම නිසා සිදුවූ පාඩුව වෙනුවෙන් රුපියල් ලක්ෂයක වන්දියක් ගෙවීමට නියම විය.
අල්ලස් හෝ දූෂණ විමර්ශන කොමිසමේ සහකාර අධ්‍යක්ෂ ජනරාල් සමඟ සහකාර අධ්‍යක්ෂ (නීති) පැමිණිල්ල මෙහෙයවූහ.
(ස්තූතිය - චන්දන ජයවීර - දිනමිණ)
---------------------------
by (2025-06-25 19:19:51)
Read 17844 Times
Leave a Reply
0 discussion on this news
අජිත් ගලප්පත්තිගේ සිනමා විචාර එකතුව
අතීතයෙන් පාඩමක් - විශේෂඥ වෛද්‍ය අජිත් අමරසිංහ ලිපි