ආගමන හා විගමන නිලධාරීන්ගේ මුහුණින් සිනහව අතුරුදහන් වී ඇත්තේ ඇයි..? දුක හිතෙන සත්‍ය කතාවක්..!

-ආගමන හා විගමන නිලධාරීන් පිරිසක් ලියති

(ලංකා ඊ නිව්ස් -2025.ජූලි.03, පෙ.ව‍.7.25) අපි ආගමන හා විගමන නිලධාරීන් වශයෙන් කිසිදු වෘත්තීය ක්‍රියාමාර්ගයකින් ගුවන් මගීන් මේ වන තෙක් අපහසුතාවයකට පත් කර නැත. සෞඛ්‍ය සේවකයින් හෝ දුම්රිය සේවකයින් මෙන් පොදු ජනතාව අපහසුතාවයකට පත් කර අපේ ඉල්ලීම් දිනා ගැනීම අපේ බලාපොරොත්තුව නොවේ. එහෙත් වසර ගණනක් පුරාවට පැවැත එන පහත ගැටලුවලට තිරසාර විසඳුම් ඉදිරිපත් කිරීමට මෙතෙක් කිසිම බලධාරියෙක් කටයුතු කර නැති බවත් සැමවිටම බොරු පොරොන්දු දී ලිස්සා ගොස් ඇති බවත් අපි  වගකීමෙන් යුතුව දැනුම් දෙමු. දැනට අප හට මාධ්‍ය ප්‍රකාශකවරයෙක් නොමැත්තේ ද ඉහල නිලධරින්ගේ ඇති වෙන බලපෑම නිසා බව ද කිව යුතුය. පහත ප්‍රශ්න නිසා අප නිරන්තරයෙන් දෝෂ දර්ශන වලට ලක් වන අතර, එසේ සිදුවන්නේ අප විඳින දුක්, ප්‍රශ්න කිසිවෙකු නොදන්නා බැවිනි. තව දුරටත් මෙම ප්‍රශ්න විද දරා ගැනීමට අපහසු බැවින් අප හට දැන් මහජන සහය අවශ්‍ය වී ඇත. 

දෙපාර්තමේන්තුවේ වෙනත් පාලකවරුන් හා අනිකුත් නිලධාරීන් දුෂණ චෝදනාවකට අසු වුවත් එය මාධ්‍ය විසින් වාර්තා කරන්නේ ආගමන හා විගමන නිලධාරියෙක් කළ දුෂණයක් ලෙසය. එම නිසා සමාජයෙන්, යාලුවන්ගෙන් හෝ හිතවතුන්ගෙන් විවිධාකාරයෙන් අප අපහසුතාවයන්ට ලක් වේ. දෙපාර්තමේන්තුවේ සේවය කළ පලියට සෑම රාජ්‍ය සේවකයෙක් ම ආගමන හා විගමන නිලධාරියෙක් නොවේ. ආගමන හා විගමන නිලධාරීන් වශයෙන් මේ දැනුම් දෙන්නේ අපට ඇති ප්‍රශ්න වලින් ඉතාමත් බිඳක් පමණි. සැම පාර්ශවයකම ඇති චෝදනාව වී තිබෙනුයේ "මුන් නිකන් මිනිස්සුන්ට සුහදශීලී විදියට සේවය කරන්නේ නැහැනේ . ඉතින් කොහෙද tourists ල එන්නේ " යනුවෙනි. පහත සදහන් ගැටළු ඔබ විමසා බැලුවොත්, අපට මෙම ගැටළු සිතේ තබාගෙන නිදහසේ , කාර්යක්ෂමව සේවය කළ නොහැකි බව ඔබට පසක් වනු ඇත. 

අපට තව දුරටත් මේවා දරා ගෙන සිටීමට නොහැකිය. එබැවින් අඩුම තරමේ මහජනතාව හෝ දැනුවත් කර ඔවුන්ගෙන් අපට එල්ලවන චෝදනා අඩු කර අපට ඇති පීඩනය බිඳක් හෝ අඩු කර ගැනීමට ඔබෙන් විශාල සහයක් අවශ්‍ය වී ඇත. හැකි ඉක්මනින් මේ සඳහා මැදිහත් වන ලෙස ඉල්ලමු. 

1. ශ්‍රී ලංකා පරිපාලන සේවයේ (SLAS) නිලධාරීන්ගේ ඇඟිලි ගැසීම්...

SLAS අධි-ආධිපත්‍යය: ආගමන නිලධාරීන්ගේ වෘත්තීය වර්ධනයට අවහිර කරයි.

සහකාර පාලක ශ්‍රේණියේ සිට ඉහළට, බොහෝ තනතුරු ශ්‍රී ලංකා පරිපාලන සේවයේ (SLAS) නිලධාරීන් විසින් දරනු ලැබේ. අපි ඔවුන්ගේ පරිපාලන ධාරිතාවට ගරු කළත්, මෙම අධික ලෙස යැපීම හානිකර බලපෑම් ඇති කර ඇත:

* වසර ගණනාවක් මෙහෙයුම් සේවයේ ගත කර ඇති වෘත්තීය ආගමන නිලධාරීන් නිරන්තරයෙන් මඟ හරිනු ලැබේ.

* SLAS නිලධාරීහු සාමාන්‍යයෙන් කෙටි කාලයක් සඳහා සේවය කරති. බාහිර බලපෑම් මත තීරණ ගනිති. බොහෝ විට දේශසීමා සහ සංක්‍රමණ කටයුතු සම්බන්ධයෙන් අවශ්‍ය ප්‍රායෝගික දැනුම නොමැත.

* ගුවන් සමාගම්, දේශපාලන අතරමැදියන් සහ වෙනත් අයගෙන් ලැබෙන බාහිර ඉල්ලීම් සහ බලපෑඹ් මත ඔව්හු ප්‍රධාන තීරණ වලට එළඹෙති. එය  දෙපාර්තමේන්තුවේ මධ්‍යස්ථභාවයට හානි කරයි.

* පසුගිය රජයේ යුගයේදී ආරක්ෂක ලේකම් කමල් ගුණරත්න අපගේ සේවා ව්‍යවස්ථා ගැටළුව විසඳීම සම්බන්ධයෙන් අපට උදව් කිරීමට එකඟ වූ විට  SLAS නිලධාරීහු කමල් ගුණරත්නට පවා තර්ජනය කළහ.

* වීසා ශාඛාව, විදේශ කළමනාකරණය සහ පුරවැසි ශාඛාව වැනි සමහර ශාඛා සැබැවින්ම හිටපු ආගමන නිලධාරීන් විසින් පවත්වාගෙන යා යුතුය. ආගමන නිලධාරීන්ගෙන් එම ශාඛාවල නියෝජ්‍ය පාලකවරුන් පත් කළ යුතුය

* අපගේ ගැටළු සම්බන්ධයෙන් අප ඉදිරිපත් කරන ලිපි SLAS නිලධාරීන් විසින් හිතාමතාම ප්‍රමාද කරන අවස්ථා එමට ය.

* කළමනාකරණ සේවා දෙපාර්තමේන්තුවේ සහ රාජ්‍ය සේවා කමිටුවේ පෙර අධ්‍යක්ෂ ජනරාල්වරයා ද බොහෝ විට අපව අවහිර කළේය.

* පසුගිය වසරේ අපි මගීන්ට කරදර නොකර අහිංසක වෘත්තීය සමිති ක්‍රියාමාර්ගයක් ගැනීමට (අපේ අත්වල කළු පටි පැළඳ) උත්සාහ කළෙමු. ජ්‍යෙෂ්ඨ ආගමන නිලධාරීන් වන නියෝජ්‍ය පාලක සුජීව රත්නායක සහ හිටපු පාලක ජෙනරාල් ඉලුක්පිටිය විසින් එයට පවා තර්ජනය කරන ලදී. අපට තර්ජනය කළ ජ්‍යෙෂ්ඨ ආගමන නිලධාරීහු ද ඉලුක්පිටිය  සහ සුජීව රත්නායක මත යැපුණු අය වූහ.

* SLAS ආධිපත්‍යය අපගේ දෙපාර්තමේන්තුවට මාෆියාවකි. වැරදි ක්‍රියා පටිපාටිවලට එරෙහිව කතා කළ නිලධාරීන් බොහෝ ව්‍යාජ දූෂණ චෝදනාවලට මුහුණ දී තිබුණි.

ගෝලීය වශයෙන් බොහෝ ආගමන සේවා මෙහෙයවනු ලබන්නේ වෘත්තීය වෘත්තිකයන් විසින් වන අතර, මෙහෙයුම් ස්වාධීනත්වය සහ ආයතනික මතකය සහතික කරයි. ශ්‍රී ලංකාව මෙම ආකෘතිය කරා ගමන් කරන ලෙස අපි ගෞරවයෙන් ඉල්ලා සිටිමු. උදාහරණයක් ලෙස, බොහෝ රටවල පරිපාලනයන් මෙහෙයුම් ක්‍රියා පටිපාටි, මෙහෙයුම් ගැටළු සහ දුක්ගැනවිලි හරියටම හඳුනා ගන්නා හිටපු පළපුරුදු ආගමන නිලධාරියෙකු දෙපාර්තමේන්තුවේ ප්‍රධානියා (පාලක ජෙනරාල්) ලෙස පත් කර ඇත. නමුත් අපේ සිද්ධිය හරියට "ධීවරයෙක් තේ වත්තක් කළමනාකරණය කරනවා" වැනි ය.

2. "ෆාස්ට් ට්‍රැක්" අරමුදල් අනිසි ලෙස භාවිතා කිරීම සහ කාර්ය මණ්ඩල සුභසාධනය නොසලකා හැරීම පිලිබඳ..

* 'ෆාස්ට් ට්‍රැක් සේවා' සඳහා මගියෙකුගෙන් ඇමරිකානු ඩොලර් 50 ක අමතර ගාස්තුවක් අය කෙරේ. ආගමන දෙපාර්තමේන්තුවට ලැබෙන්නේ ඇමරිකානු ඩොලර් 2 ක් පමණක් වන අතර ඉතිරිය අපැහැදිලි සහ ගණන් කළ නොහැකි විධිවිධාන යටතේ අනෙකුත් පාර්ශවයන් අතර බෙදා හරිනු ලැබේ.

* පසුගිය මාස 18 තුළ එලෙස රුපියල් මිලියන 16.7 කට වඩා එකතු කර ඇත - නමුත් ආගමන නිලධාරීන්ගේ සුභසාධනය සඳහා එක රුපියලක්වත් වෙන් කර නොමැත.

* නිසි අනුමැතියකින් හෝ විනිවිදභාවයකින් තොරව, ජ්‍යෙෂ්ඨ නිලධාරීන් විනෝදාස්වාදය හෝ පුද්ගලික වියදම් සඳහා මෙම අරමුදල් අනිසි ලෙස භාවිතා කරන බවට 'විශ්වාසදායක කනස්සල්ලක්' අප තුල පවතී.

* සාමාන්‍ය රාජකාරි සම්පූර්ණ කරන අතරතුර 'ෆාස්ට් ට්‍රැක් සේවා' රාජකාරිවලට සහභාගී වීම ඇත්තෙන්ම දුෂ්කර බව පැවසිය යුතුයි. මන්ද ඔවුන්ට නිලධාරීන් නොමැති අතර අධික දුරක් ඇවිදීමට සිදුවේ. එක් 'ෆාස්ට් ට්‍රැක්' මගියෙකු පරීක්ෂාකර යැවීමේ දී වෙනත් මගීන් 15-20 ක් ප්‍රමාද කිරීමට සිදුවීම ගැන සිතන්න. එක් ෆාස්ට් ට්‍රැක් මගියෙකු පරීක්ෂාකර යැවීම සඳහා නිලධාරියෙකු ආගමන ප්‍රදේශයෙන් බැස ගුවන් ටිකට්පත් පරීක්ෂා කිරීමේ ප්‍රදේශයේ කෙළවරට ඇවිද යා යුතුය. එවැනි දායකත්වයක් ලබා දීමෙන් පසුව පවා, ආගමන දෙපාර්තමේන්තුවට ලැබෙන්නේ ඇමරිකානු ඩොලර් 2 ක් පමණි.

3. අධික සහ නොගෙවූ වැඩ පැය...

* නිලධාරීන්ට සෑම මසකම අඛණ්ඩව දිවා මුර 6 ක් සහ අඛණ්ඩව රාත්‍රී මුර 6 ක් පවරනු ලැබේ.

* රාත්‍රී මුර පැය 16 ක් (ප.ව. 5 සිට පෙ.ව. 9 දක්වා) පවතින අතර එය සම්මත ශ්‍රම සම්මතයන් ඉක්මවා යෑමකි.

* බහු විධිමත් ඉල්ලීම් තිබියදීත්, නිලධාරීන්ට රාත්‍රී රාජකාරි හෝ වෛද්‍ය දීමනා නොලැබේ. අප නිරන්තරව UV ආලෝක ස්කෑනර් යන්ත්‍රවලට නිරාවරණය වේ. එය සිරුරට අහිතකර ය. වරාය තුල එම යන්ත්‍ර භාවිතා කරන නිලධාරීන්ට නැව් නැරඹීමේදී අධික අවදානමක් සිදුවේ.

* රාජ්‍ය සේවා කොමිෂන් සභාව සහ මුදල් අමාත්‍යාංශය වැනි ආයතනවලට අපගේ දීමනා ඉල්ලීම් ඉදිරිපත් කිරීම ජ්‍යෙෂ්ඨ කළමනාකාරිත්වය විසින් හිතාමතාම ප්‍රමාද කරන බවට චෝදනා දිගටම පවතී.

ශ්‍රී ලංකා රාජ්‍ය අංශයේ රෙගුලාසි (ස්ථාපන සංග්‍රහය, PSC රීති):

* සාමාන්‍ය රාජකාරිය: දිනකට පැය 8 (විවේකයක් ඇතුළුව).

* උපරිම වැඩ කරන වේලාවන් රාජ්‍ය පරිපාලන ප්‍රමිතීන්ට අනුකූල විය යුතු අතර, පැය 12 කට වැඩි ඕනෑම වැඩ මුරයක් අක්‍රමවත් එකක් ලෙස සලකනු ලබන අතර ඉහළ බලධාරීන් විසින් එය අනුමත කළ යුතුය (උදා: අමාත්‍යාංශ ලේකම්, PSC).

* රාත්‍රී රාජකාරි දීමනා සහ සෞඛ්‍ය ආරක්ෂණ අදාළ වන විට අනිවාර්ය වේ.

* අඛණ්ඩ පැය 16 ක වැඩ මුරය ක දී, විශේෂයෙන් අඛණ්ඩ 6 ක දී , පහත සඳහන් දෑ උල්ලංඝනය වනු ඇත:

වෘත්තීය ආරක්ෂාව සහ සෞඛ්‍ය (OSH) රෙගුලාසි
ප්‍රමාණවත් විවේකයක් සඳහා සේවක අයිතිවාසිකම්
රාජ්‍ය සේවකයින් සඳහා සුභසාධන විධිවිධාන

කම්කරු නීති (සාප්පු සහ කාර්යාල සේවක පනත, කර්මාන්තශාලා ආඥා පනත):

මේවා ප්‍රධාන වශයෙන් පෞද්ගලික අංශයට අදාළ වුවද, ඒවා අවම සීමාවක් නියම කරයි:

* දිනකට පැය 9කට වැඩි කාලයක හෝ සතියකට පැය 45කට වැඩි කාලයක සේවයේ දී අතිකාල වැටුප් වැඩි කර තිබේ.

* සේවකයින්ට පහත හිමිකම් ඇත:
සතියකට එක් විවේක දිනයක්
සෑම පැය 6ක වැඩ සඳහාම අවම වශයෙන් පැය 1ක විවේකයක්

අපට ඒ තරම් හෝ අයිතියක් නැතිද?

4. යල් පැන ගිය දිරි දීමනා යෝජනා ක්‍රමය සහ අසමාන වන්දි ගෙවීම්...

* කාර්ය මණ්ඩල කවුන්ටරවල නිලධාරීන් විසින් ගුවන් සේවා කාර්ය මණ්ඩලය, රාජ්‍ය තාන්ත්‍රිකයින් සහ විශේෂ අවශ්‍යතා ඇති මගීන් සම්බන්ධයෙන් අධික පීඩනයෙන් යුතු කාර්යයන් කළමනාකරණය කරනු ලැබේ. විශේෂ අවශ්‍යතා ඇති මගීන්ට අපගේ කැපවූ සහාය පිරිනැමීමට අපි කැමතියි, නමුත් මෙම කවුන්ටරයේ ක්‍රියාකාරිත්වය අතරතුර අපි දරාගත නොහැකි ආතතියකට මුහුණ දෙමු.

* දෙපාර්තමේන්තුව අපට මසකට නිෂ්කාශනය කරන ලද මගීන් සංඛ්‍යාව මත පදනම්ව දිරි දීමනා යෝජනා ක්‍රමයක් ලබා දී ඇත. නමුත් වසර 7 කට වැඩි කාලයක් තිස්සේ දිරි දීමනා නොවෙනස්ව පවතින අතර ගුවන් සේවා කාර්ය මණ්ඩල නිෂ්කාශනය කිරීම සහ නාවිකයින් සම්බන්ධයෙන් 'බැඳුම්කර නිෂ්කාශනය' සඳහා කිසිදු දිරි දීමනාවක් නොමැත. නමුත් ඔවුන්ව නිෂ්කාශනය කරන්නේ ද අපම නොවේ ද?.

* පැමිණීමේ වීසා කවුන්ටරයේ රාජකාරි කරන නිලධාරීන් මුදල් සහ ආරක්ෂක පරීක්ෂාවන් ඇතුළත් සංවේදී මෙහෙයුම් හසුරුවන නමුත් ඔවුන්ට කිසිදු දිරි දීමනාවක් නොලැබේ. පුදුමයක් නොවේ ද?

5. ව්‍යාපාරික පන්තියේ කවුන්ටර රාජකාරි අනවසරයෙන් පැවරීම...

* මෑතකදී නිලධාරීන්ට නව ව්‍යාපාරික පන්තියේ ආගමන කවුන්ටරයක් ​​ක්‍රියාත්මක කිරීමට උපදෙස් දෙන ලදී. නමුත් ඊට අවශ්‍ය පහත කාරණා ඉටු කර නැත.

කිසිදු නිල චක්‍රලේඛයක් හෝ ගැසට් නිවේදනයක් නැත.
අතිරේක කාර්ය මණ්ඩලයක් හෝ සම්පත් ලබා දී නැත.
කිසියම් විධිමත් දිරිගැන්වීමක් හෝ නීතිමය ආරක්ෂාවක් නැත.

* මෙම නියාමනය නොකළ රාජකාරි නිසා මගී ගැටුම් සහ මෙහෙයුම් අවදානම් වලට තුඩු දෙනු ඇත. නිලධාරීන් නීතිමය පදනමක් නොමැතිව රාජකාරි කිරීම ප්‍රතික්ෂේප කළ විට, ඔවුන්ට එරෙහිව විනය ක්‍රියාමාර්ග ගන්නා බවට තර්ජනය කරන ලදී.

* මෙම කවුන්ටරය සක්‍රීය කිරීම සඳහා අපි නීතිමය පදනමක් ඉල්ලා නොසිටිමු. මන්ද යත් මෙය බොහෝ විට මගීන් සහ නිලධාරීන් අතර ආරවුල් ඇති කර තිබේ. වත්මන් පිරිසැලසුම සහ තත්වය හේතුවෙන් ව්‍යාපාරික පන්තියේ මගීන්ට ආගමන නිලධාරියෙකු වෙත පෝලිමක් නොමැතිව පැමිණිය හැක්කේ මන්දැයි අනෙකුත් මගීන්ට තේරුම් ගත නොහැකි ය. එවැනි විශේෂිත සේවාවක් සැපයීම සම්බන්ධයෙන් බොහෝ විට චෝදනා එල්ල වන්නේ ආගමන නිලධාරීන්ට ම ය.

6. යල් පැන ගිය සහ අවදානමට ලක්විය හැකි ආගමන තොරතුරු තාක්ෂණ පද්ධතිය...

* වත්මන් නිෂ්කාශන පද්ධතිය තාක්‍ෂණිකව යල් පැන ගිය එකක් වන අතර, මුහුණු හඳුනාගැනීම සහ ඇඟිලි සලකුණු සත්‍යාපනය වැනි අත්‍යවශ්‍ය ආරක්ෂක අංග නොමැත.

* පද්ධති ප්‍රමාදයන් සහ අනතුරු නිතර සිදුවන අතර එය කාර්යක්ෂමතාව සහ දේශසීමා ආරක්ෂාව යන දෙකටම බලපානු ඇත. 2023/09/11 දින සැලකිය යුතු පද්ධති ප්‍රමාදයක්, දින භාගයක් සහ 2025/01/07 දින පැයක ප්‍රමාදයක් ඇති කළේය. එබැවින් මෙම හේතු නිසා ශ්‍රී ලංකාව පුරා ගමන් කරන සංචාරකයින්/විදේශිකයන් ඇතුළු මගීන්ට පිළිවෙලින් පැය 4 කට සහ පැය 01 කට වඩා පෝලිමේ රැඳී සිටීමට සිදු විය. එම දින දෙක පසුගිය මාස කිහිපය තුළ විශාලතම පද්ධති බිඳවැටීමට හේතු වූ දිනයන් වේ. නමුත් සෑම දිනකම සැලකිය යුතු ප්‍රමාදයක් නොතිබුණද, අපි බොහෝ විට පද්ධති දෝෂ සහ බෆරින් වලට මුහුණ දෙන අතර එය අකාර්යක්ෂම මගී නිෂ්කාශනයකට මග පාදා ඇත. පළමු වරට ශ්‍රී ලංකාවට පැමිණෙන සහ මෙම නරක තත්වයට මුහුණ දෙන සංචාරකයෙකු ගැන සිතන්න. මෙම බර දරා ගැනීමට සහ මගීන් විසින් මතු කරන ලද චෝදනාවලට පිළිතුරු දීමට සිදුවන්නේ ආගමන දෙපාර්තමේන්තුවේ ප්‍රධාන කාර්යාලයේ පරිපාලනයට හෝ අදාළ අමාත්‍යවරයාට නොවේ ගුවන්තොටුපළේ කවුන්ටරයේ එම අවස්ථාවේ රාජකාරි කරන ආගමන නිලධාරීන්ට ය.

* ඉහත පද්ධති ප්‍රමාදයට ප්‍රධාන වශයෙන් හේතු වී ඇත්තේ දෙපාර්තමේන්තුවේ යල් පැන ගිය සර්වර් යන්ත්‍ර නිසාය. පසුගිය වසර 11 තුළ මෙම සර්වර් නියමිත වේලාවට යාවත්කාලීන කිරීමට බලධාරීන් අදාළ පියවර ගෙන නොමැත/

* භයානක දේ නම් මුළු පද්ධතියම කළමනාකරණය කරනු ලබන්නේ ආගමන නිලධාරීන් සම්බන්ධ නොවූ පෞද්ගලික සමාගමක් (Informatics) විසින් වීමයි. එය ජාතික ආරක්ෂාවට සේම මෙහෙයුම් අවදානම් ද ඇති කරයි.

7. විදේශයන්හි ශ්‍රී ලංකා තානාපති කාර්යාලවල ආගමන නිලධාරීන් නොමැති වීම..

* වෙනත් බොහෝ රටවල් මෙන් නොව, ශ්‍රී ලංකාවේ විදේශයන්හි තානාපති කාර්යාලවල හෝ කොන්සල් කාර්යාලවල ආගමන නිලධාරීන් යොදවා නොමැත.

* එම රාජකාරි කරන සුදුසුකම් නොලත් පුද්ගලයින් විසින් සංක්‍රමණික සේවකයින්ට සහ සංචාරකයින්ට නිතර වැරදි තොරතුරු ලබා දීමට හේතු වී ඇති අතර, එහි ප්‍රතිඵලයක් ලෙස:

ආගමන කවුන්ටරවල දී නිතර ආරවුල් සිදුවේ.
ඉදිරි පෙළ රාජකාරි කරන නිලධාරීන්ට අසාධාරණ ලෙස දොස් පැවරීම මෙන්ම අර්බුදකාරී අවස්ථාවන්හිදී ජ්‍යෙෂ්ඨ කළමනාකාරිත්වයෙන් එල්ල වන පීඩනය ද සිදුවේ.

* තානාපති කාර්යාලවලට පුහුණුව ලත් නිලධාරීන් යෙදවීමෙන් එවැනි සිදුවීම් බෙහෙවින් අඩු කරන අතර වීසා සහ සංචාරක මාර්ගෝපදේශවල නිරවද්‍යතාවය වැඩි දියුණු කරනු ඇත.

8. පිටත්වීමේ ප්‍රදේශයන්හි ඇති කවුන්ටරවල දුර්වල සැලසුම..

* කවුන්ටරයට ළඟා වීමට පෙර මගීන්ව දෘශ්‍යමය වශයෙන් තක්සේරු කිරීමට හෝ ප්‍රොෆයිල නිරීක්ෂනය කිරීමට වත්මන් පිරිසැලසුම (Layout) මගින් නිලධාරීන්ට  ඉඩ නොලැබේ.

* කැමරා ස්ථානගත කිරීම් හි පවතින පිරිසැලසුම් නිසා නිලධාරීන්ට නිරන්තරයෙන් ඔවුන්ගේ බෙල්ල ඇඹරීමට බල කෙරෙන අතර, එහි ප්‍රතිඵලයක් ලෙස නිදන්ගත බෙල්ලේ වේදනාව සහ ශාරීරික ආතතිය ඇති වේ.

* කුමන කවුන්ටර තිබේදැයි හඳුනා ගැනීමට අපහසු බැවින් මගීහු ද ව්‍යාකූලත්වයට හා ප්‍රමාදයන්ට මුහුණ දෙති.

* ඉදිරි පෙළ නිලධාරීන්ගේ රාජකාරීන් සමඟ පවතින පිරිසැලසුම සමාලෝචනය කර කාර්යක්ෂමතාව සහ මෙහෙයුම් ආරක්ෂක ප්‍රමිතීන් මත පදනම්ව අලුතින් පිරිසැලසුමක් වහාම නිර්මාණය කරන ලෙස අපි ඉල්ලා සිටිමු.

9. තීරණාත්මක කාර්ය මණ්ඩල හිඟය සහ වහාම බඳවා ගැනීමේ අවශ්‍යතාවය..

දෙපාර්තමේන්තුව දැනට නිලධාරීන් 100 කට අධික හිඟයක් සහිතව ක්‍රියාත්මක වන අතර, එමගින් ඉදිරි පෙළ සේවා සහ දේශසීමා පාලන කාර්යයන් මත පීඩනයක් එල්ල කර තිබේ. වත්මන් පුරප්පාඩු පිරවීම සහ අනාගත අවශ්‍යතා සඳහා සූදානම් වීම සඳහා 2025 ජූලි තරඟ විභාගය හරහා අවම වශයෙන් ආගමන නිලධාරීන් 200 ක් වහාම බඳවා ගැනීමට අපි නිර්දේශ කරමු.

10. පරිපාලන සේවයේ (SLAS) නිලයන් අපගේ උසස්වීම් යෝජනා ක්‍රමය මත ආධිපත්‍යය දරමින් එය අවහිර කර ඇත...

ඉහත හේතුව නිසා මේ දිනවල, සාමාන්‍යයෙන් ආගමන නිලධාරීන්ට ජ්‍යෙෂ්ඨ බලයලත් නිලධාරීන් / ජ්‍යෙෂ්ඨ ආගමන නිලධාරීන් ලෙස උසස්වීම් ලබා ගැනීම සඳහා අවම වශයෙන් අවුරුදු 15 ක් පෝලිමේ සිටීමට සිදුව තිබීම ඛෙදජනක ය.

-ආගමන හා විගමන නිලධාරීන් පිරිසක් විසිනි

(සිංහලට නැගුවේ -චන්ද්‍රප්‍රදීප්)

---------------------------
by     (2025-07-03 02:02:05)

Read 38472 Times

Leave a Reply

  0 discussion on this news