කොළඹ වරාය නගරයට ලන්ඩනයේ 'බිග් බෙන්' පන්නයේ ගිනස් වාර්තාවක් තැබෙන ග්‍රෑන්ඩ් ඔරලෝසුවක්..!

(ලංකා ඊ නිව්ස් -2025.ජූලි.21, ප.ව‍.10.15) ඇමරිකානු ඩොලර් මිලියන 540 කට අධික ආයෝජනයකින් කොළඹ වරාය නගරයේ ඉදිකිරීම සඳහා මහා පරිමාණ ව්‍යාපෘතියක් සැලසුම් කර ඇත. ලන්ඩනයේ බිග් බෙන් පන්නයේ මීටර් 15 ක විෂ්කම්බයකින් යුත් ග්‍රෑන්ඩ් ඔරලෝසුවකින් සමන්විත ලොව විශාලතම කලා කෘතියක් බවට පත්විය හැකි දෙයක් ඇතුළත් කිරීම මෙම සංවර්ධනයේ අරමුණ වන අතර එය ගිනස් ලෝක වාර්තාවක් තැබීම සඳහා ඉදිරිපත් කිරීමට අපේක්ෂා කෙරේ.

ක්ලෝත්ස්පින් ටවර්ස් (Clothespin Towers) ලෙස නම් කර ඇති මෙම ව්‍යාපෘතිය, ශ්‍රී ලංකා රජයෙන් බදු නිදහස් කිරීම් ලබා ඇති වරාය නගරයේ ප්‍රධාන සංවර්ධන කටයුතු හතරෙන් එකකි. ජනාධිපති අනුර කුමාර දිසානායක විසින් මුදල් අමාත්‍යවරයා ලෙස මෑතකදී නිකුත් කරන ලද රජයේ ගැසට් නිවේදනවලට අනුව, මේවාට ආදායම් බදු, වැට් බදු, රේගු බදු සහ අනෙකුත් බදු වලින් සහන ඇතුළත් වේ.

ක්ලෝත්ස්පින් කළමනාකරණ සහ සංවර්ධන (පුද්ගලික) සමාගම (Clothespin Management and Development (Pvt) Ltd.) විසින් මෙහෙයවනු ලබන ක්ලෝත්ස්පින් ටවර්ස් ව්‍යාපෘතියේ සුඛෝපභෝගී මහල් නිවාස, තරු හතක හෝටලයක්, සිල්ලර වෙළඳසැල් සහ කුලියට ලබාදෙන කාර්යාල අවකාශ සහිත  කුළුණු දෙකක් ඇතුළත් වේ. එක් කුළුණක ලොව විශාලතම සිරස් කලාගාරය පිහිටවනු ඇති අතර, එහි සෑම මහලක්ම ගෝලීය කලාකරුවන්ගේ අද්විතීය කලා ප්‍රදර්ශන පැවැත්වෙන අවකාශ සහ ලෝක මට්ටමේ සම්මන්ත්‍රණ රැස්වීම් ආදී සිදුවීම් සඳහා අවකාශ සලසනු ඇත.

ආයෝජකයන් ඩොලර් මිලියන 540 කට වඩා වියදම් කිරීමට සැලසුම් කර ඇති අතර, ඉන් ඩොලර් මිලියන 75 ක් ඉඩම් බදු ගැනීම සඳහා සහ ඉතිරිය ඉදිකිරීම් සඳහා වේ.

මෙම ව්‍යාපෘතිය එහි පළමු වසර තුළ පමණක් රැකියා 280 ක් පමණ උත්පාදනය කරනු ඇත.

මෙම සමාගම විසින් ඩුබායි හි ද 'ක්ලෝත්ස්පින් ටවර්ස්' ඉදිකර තිබේ.

තවත් මහා පරිමාණ ව්‍යාපෘති තුනක්..

'ක්ලෝත්ස්පින් ටවර්ස්' සමඟ වරාය නගරයේ තවත් මහා පරිමාණ ව්‍යාපෘති තුනකට සමාන බදු සහන ලබා දී ඇත.

එකක් ICC පෝර්ට් සිටි (පුද්ගලික) සමාගම වර්ග මීටර් 13,945 ක ඉඩමක සුඛෝපභෝගී මහල් නිවාස සහිත කුළුණු දෙකක් සහ ඉහළ මට්ටමේ විලා පහක් ඉදිකරනු ඇත.

දෙවැන්න චයිනා හාබර් ඉංජිනේරු සමාගමේ සහාය ඇතිව IFC කොළඹ 1 (පුද්ගලික) සමාගම නේවාසික, වාණිජ සහ සිල්ලර පහසුකම් ඒකාබද්ධව සිදුකරන මිශ්‍ර සංවර්ධන ව්‍යාපෘතියක් සඳහා සැලසුම් කර තිබේ. එකී සමාගම ඩොලර් මිලියන 143 ක් පමණ ආයෝජනයක් කිරීමට සැලසුම් කරන අතර ඉදිකිරීම් සඳහා ඩොලර් මිලියන 95 කට ආසන්න මුදලක් වැය කරයි.

තුන්වැන්න බ්‍රවුන්ස් ඉන්වෙස්ට්මන්ට්ස් සහ LOLC සමූහයේ කොටසක් වන සිලෝන් රියල් එස්ටේට් හෝල්ඩින්ග්ස් (පුද්) සමාගම, වර්ග මීටර් 30,000 කට වැඩි භූමි ප්‍රමාණයක මහා පරිමාණ වාණිජ හා නේවාසික සංකීර්ණයක් නිර්මාණය කරනු ඇත. මෙම ව්‍යාපෘතියට කාර්යාල අවකාශ, සිල්ලර ප්‍රදේශ සහ සුඛෝපභෝගී මහල් නිවාස ඇතුළත් වන අතර, මුළු ආයෝජනය ඇමරිකානු ඩොලර් මිලියන 411 කට වැඩි වන අතර අමතර ඉඩම් පිරිවැයක් ද ඇතුළත් වේ.

ඍජු විදේශ ආයෝජන 101% ක වර්ධනයක්

මේ අතර පසුගිය වසරේ මුල් මාස 6 ට වඩා මේ වසරේ මුල් මාස 6 තුල ඍජු විදේශ ආයෝජන ගලා ඒම 101% කින් වර්ධනය වී ඇතැයි ආයා්ජන මණ්ඩලය කියයි. මේ වසරේ මුල් මාස 6 තුල විදේශ ආයෝජන ගලා ඒම ඇ.ඩො. මිලියන 507 කට අධික වන අතර පසුගිය වසරේ මුල් මාස 6 තුල එය ඇ.ඩො. මිලියන 252 ක් විය. 

(ඩේලි මිරර් වාර්තාවක් ඇසුරිනි )

---------------------------
by     (2025-07-21 16:51:01)

Read 21768 Times

Leave a Reply

  0 discussion on this news