අල්ලස් කොමිසමෙන් අත් අඩංගුවට ගත් ශෂීන්ද්‍ර රාජපක්ෂ රිමාන්ඩ්..!

(ලංකා ඊ නිව්ස් -2025.අගෝ.06, ප.ව‍.6.40) අල්ලස් කොමිසම මගින් අද(06) උදෑසන නුගේගොඩ පිහිටි නිවසක දී අත්අඩංගුවට ගත් හිටපු රාජ්‍ය අමාත්‍ය ශෂීන්ද්‍ර රාජපක්ෂ ලබන 19 වනදා දක්වා රක්ෂිත බන්ධනාගාර ගත කරන ලෙස කොළඹ මහෙස්ත්‍රාත් අධිකරණය නියම කර තිබේ.

අල්ලස් කොමිසමේ නිලධාරීන් හා විත්තියේ නීතිඥවරු ඉදිරිපත් කළ කරුණු සලකා බැලීමෙන් අනතුරුව කොළඹ ප්‍රධාන මහෙස්ත්‍රාත් තනූජා ලක්මාලී ජයතුංග මහත්මිය විසින් මෙම නියෝගය නිකුත් කරන ලදී.

මහවැලි අධිකාරියට අයත් සෙවනගල, කිරිඉබ්බන් වැව ප්‍රදේශයේ පිහිටි ඉඩමක අනවසරයෙන් ඉදිකර ඇති ගොඩනැගිල්ලක් ඇතුළු දේපොළ කිහිපයක් 2022.05.09 වන දින පැවති ජනතා අරගලයේ දී හානියට පත්ව ඇත.

එම දේපොළ සඳහා වන්දි ගෙවීමේ දී එය ශ්‍රී ලංකා මහවැලි අධිකාරිය සතු දේපොළක් බවට නිලධාරීන් විසින් හඳුනාගෙන අදාළ වන්දි ගෙවීම ප්‍රතික්ෂේප කර තිබිය දී ඊට පටහැනිව හානිපූර්ණය සඳහා වන කාර්යාලයට අනුයුක්තව කටයුතු කළ සමහර රජයේ නිලධාරීන්ට තම නිල බලය භාවිත කරමින් බලපෑම් සිදුකර වන්දි ලබාගෙන ඇතැයි ශෂීන්ද්‍ර රාජපක්ෂ ට චෝදනා එල්ල වී තිබේ.

වාර්තා වන අන්දමට නොතිබූ ගොඩනැගිල්ලක් තිබුනා කියා සහ එය ගිනි ගෙන විනාශ වුනා කියා රුපියල් එක්කෝටි පනස් ලක්ෂයකට අධික මුදලක් වන්දි වශයෙන් ලබා ගෙන ඇත.

එමෙන්ම එම වන්දි ලබාගැනීමෙන් දූෂණය නැමති වරද සිදුකිරීම සහ කුමන්ත්‍රණය කිරීම මෙන්ම මෙම දේපොළ මහවැලි අධිකාරිය සතු ඉඩමක පැවති බැවින් මහවැලි අධිකාරිය සතු දේපොළක් සාපරාධී සාවද්‍ය පරිහරණය තුළින් 1999 අංක 28 දරණ පනතින් සංශෝධිත 1982 අංක 12 දරන පොදු දේපොළ විෂයෙහි සිදුකරනු ලබන වැරදි පිළිබඳ 5(1) වගන්තිය යටතේ දඬුවම් ලැබිය හැකි වරදක් සම්බන්ධයෙන් ශෂීන්ද්‍ර රාජපක්ෂ අත්අඩංගුවට ගෙන තිබුණි.

ගෝඨාභය යුගයේ දී කාබනික පොහොර ආනයනයේ දී සිදුකරන ලද දූෂන සම්බන්ධයෙන් විමර්ශනයක් ද  ශෂීන්ද්‍ර රාජපක්ෂට එරෙහිව සිදුවෙමින් තිබේ.

---------------------------
by     (2025-08-06 13:19:02)

Read 13602 Times

Leave a Reply

  0 discussion on this news