-ලංකා-ඊ-නිව්ස් විමර්ශන අංශයේ වාර්තාවකි
(ලංකා ඊ නිව්ස් -2025.ඔක්.21, පෙ.ව.10.20) ණය උගුලෙන් බේරීමට විදේශ ආයෝජන දැඩි ලෙස අවශ්‍ය වන රටක් වුවද දකුණු ආසියාවේ ආයෝජකයින්ට හිතකර නොවන නිලධාරිවාදයක් සහිත රටක් ලෙස ශ්‍රී ලංකාව තවමත් පවතී.
ආයෝජකයින් සඳහා "එක්-නැවතුම් සාප්පුවක්" (one-stop shop) ලෙස කියැවෙන ආයෝජන මණ්ඩලය (BOI), ආර්ථික ප්‍රගතියේ "අවසානයක් නොමැති එක්-නැවතුමක්" (one-stop dead end) බවට පත්ව ඇත. ව්‍යාපාර-හිතකාමී ගතිකත්වයක් සහිත දොරටුවක් ලෙස කලින් සිතූ ආයෝජන මණ්ඩලය, අකාර්යක්ෂමතාවයේ සහ දූෂණයේ බලකොටුවක් බවට පිරිහී ඇත. ආයෝජකයින් තේරුම් නොගන්නා සහ ඔවුන් කෙරෙහි උනන්දුවක් නොදක්වන නිලධාරීන් විසින් ඒ 'බලකොටුව' ආරක්ෂා කරනු ලැබේ.
උත්ප්‍රාසය වේදනාකාරී ය. ජාතික ජන බලවේගයේ (NPP) රජය බලයට පැමිණියේ රාජ්‍ය ආයතන ප්‍රතිසංස්කරණය කරමින් නැවුම් ඍජු විදේශ ආයෝජන FDI ආකර්ෂණය කර ගැනීමට සහ ශ්‍රී ලංකාව තරඟකාරී කලාපීය මධ්‍යස්ථානයක් ලෙස ස්ථානගත කිරීමට පොරොන්දු වෙමිනි. නමුත් කොළඹ BOI මූලස්ථානය තුළ, තාලය තවමත් නොවෙනස්ව පවතී. ප්‍රමාදය, අහංකාරය සහ බාධා කිරීම් පිළිබඳ නිලධාරිවාදී පරණ තැටියම අදත් වාදනය වෙමින් පවතී.
BOI හරහා ව්‍යාපෘතියක් ලියාපදිංචි කිරීමට උත්සාහ කළ ඕනෑම ආයෝජකයෙකුගෙන් විමසන්න. ක්‍රියාවලිය ආරම්භ වන්නේ ආපසු ගෙවිය නොහැකි අයැදුම්පත් ගාස්තුවක් ගෙවීම, පුළුල් යෝජනාවක් ඉදිරිපත් කිරීම සහ මූල්‍ය ධාරිතාව ඔප්පු කිරීමෙනි. ඊළඟට දකින්නට සිදුවන්නේ නිලධාරිවාදී බියකරු සිහිනයකි.
ලිපිගොනු එක් දෙපාර්තමේන්තුවකින් තවත් දෙපාර්තමේන්තුවකට මාරු වේ. සෑම නිලධාරියෙකුම අලුත් ප්‍රශ්නයක් මතු කරයි. මාස කිහිපයකට පෙර ද පැහැදිලි කර ඇති "විස්තර පැහැදිලි කර ගැනීම" සඳහා ආයෝජකයින් රැස්වීම් සඳහා කැඳවනු ලැබේ. ඉන්පසු නියමිත 'කඩිසර අවධිය' පැමිණේ. ඉන්පසු අන්තර් දෙපාර්තමේන්තු කමිටු සමාලෝචනයක් සහ පසුව තවත් අභ්‍යන්තර "ඇගයීමක්" සිදු වේ. ව්‍යාපෘතියක් අවසාන අනුමත කිරීමේ අදියරට ළඟා වන විට, සම්පූර්ණ දශකයක් ගෙවී ගොස් තිබිය හැකිය.
වියට්නාමය පැය 72 ක් ඇතුළත විදේශ ආයෝජන යෝජනා අනුමත කරන යුගයක සහ ඩුබායි පැය 48 ක් ඇතුළත අනුමත කරන යුගයක, ශ්‍රී ලංකාවේ BOI තවමත් තනි අයදුම්පතක් සැකසීමට වසර ගණනාවක් ගත කරයි.
නිදහසට කරුණු වෙනස් වේ. "අපි සමාලෝචනය කරමින් සිටිමු," "එය තාක්ෂණික ඇගයීම යටතේ පවතී," "අපි වාර්තාවක් බලාපොරොත්තුවෙන් සිටිමු" ආදී කතා අසන්නට ලැබේ. නමුත් ප්‍රතිඵලය සැමවිටම එක හා සමානය. ප්‍රමාදය, බලාපොරොත්තු සුන්වීම සහ අවසානයේ ආයෝජකයා කලකිරී ඉවත්ව යෑම ය.
ප්‍රතිඵලය..? ආයෝජකයෝ ඉවත්ව යති. ව්‍යාපෘති බිඳ වැටේ. ශ්‍රී ලංකාව තවමත් එම ආර්ථික වළේම සිර වී සිටී.
ලංකා-ඊ-නිව්ස් විසින් දුටු එක්සත් ජනපද භාණ්ඩාගාර දෙපාර්තමේන්තුවේ රහසිගත ලේඛනයක් මගින් ආයෝජන මණ්ඩලයේ විශ්වසනීයත්වය සහ පාලන ව්‍යුහය පිළිබඳව බරපතල ප්‍රශ්න මතු කර තිබේ. "ක්‍රියා පටිපාටි වල ඇති අනවශ්‍ය බාධක, පාරාන්ධ ඇගයීම් නිර්ණායක සහ අන්තර් අමාත්‍යාංශ සම්බන්ධීකරණයක් නොමැතිකම" ගැන එකී වාර්තාවේ සඳහන් වේ.
එනම් ලංකාවේ ආයෝජන මණ්ඩලයේ දූෂිත, අකාර්යක්ෂම සහ ප්‍රතිපලදායක නොමැතිකම ගැන රාජ්‍ය තාන්ත්‍රික වචන වලින් කියැවෙන ආචාරශීලී ක්‍රමය එයයි.
ශ්‍රී ලංකාවේ ආයෝජන මණ්ඩලය විදේශීය ආයෝජකයින්ට සිදුකරණ හිරිහැර කිරීම්, උන්හිටි ගමන් සිදුකරණ ඉලක්ක මාරු කිරීම් සහ "අවිධිමත් පහසුකම් සඳහා ඉල්ලීම්" ගැන එක්සත් ජනපද භාණ්ඩාගාර දෙපාර්තමේන්තුවට සිය අයෝජකයන්ගෙන් නැවත නැවතත් පැමිණිලි ලැබී ඇති බව වාර්තාවේ සඳහන් වේ. "අවිධිමත් පහසුකම් සඳහා ඉල්ලීම්" යනු 'අල්ලස්' සඳහා වන රාජ්‍ය තාන්ත්‍රික සුනම්‍ය වචනයකි.
ශ්‍රී ලංකාව විදේශ ආයෝජන සංසදවලට අඛණ්ඩව සහභාගී වන නමුත් විදේශ සෘජු ආයෝජනවල (FDI) සැබෑ පරිමාව නොසැලකිය යුතු තරම් බව ද එම වාර්තාව පෙන්වා දෙයි. 2024 දී, වියට්නාමයේ ඇමරිකානු ඩොලර් බිලියන 36 ක සහ බංග්ලාදේශයේ ඇමරිකානු ඩොලර් බිලියන 4.2 ක ආයෝජන හා සසඳන විට, ශ්‍රී ලංකාවේ මුළු විදේශීය සෘජු ආයෝජන ගලා ඒම ඇමරිකානු ඩොලර් මිලියන 740 ක් තරම් සොච්චමක් පමණි.
BOI හි වත්මන් අධ්‍යක්ෂ ජනරාල් රේණුකා වීරකෝන්ගේ කෙරුවාව දැන් දැඩි විමර්ශනයට ලක්ව ඇත. රාජ්‍ය අංශයේ වෘත්තීය නිලධාරිනියක් වූ වීරකෝන්, BOI හි මෙහෙයුම් නවීකරණය කිරීම සඳහා කියා පත් කරන ලදී. නමුත් ඒ වෙනුවට ඇයගේ අධීක්ෂණය යටතේ ආයතනය තවදුරටත් අස්ථාවර වී ඇත.
බොහෝ දෙනෙක් පෙර පාලන යුගවල සිටි, දේශපාලනිකව පෙර දේශපාලන සම්බන්ධතා සහිත සහ ප්‍රතිසංස්කරණවලට එරෙහි වන ජ්‍යෙෂ්ඨ නිලධාරීන්ගේ කුඩා කවයක් මත ඇය දිගටම විශ්වාසය තබන බව අභ්‍යන්තර ආරංචි මාර්ග චෝදනා කරති.
ලංකා-ඊ-නිව්ස් වෙත කතා කළ නිර්නාමිකව සිටීමට කැමැති ආයෝජකයින් කිහිප දෙනෙකු කියා සිටියේ තමන් BOI නිලධාරීන්ගේ හිතාමතාම සිදුකළ බාධා කිරීම්වලට මුහුණ දුන් බවයි. එක් යුරෝපීය ආයෝජකයෙක් කෙලින්ම පැවසුවේ, "ඔවුන්ට ආයෝජන අවශ්‍ය නැහැ වගේ. සෑම රැස්වීමක්ම තවත් ප්‍රමාදයක්; සෑම පිළිතුරක්ම තවත් ප්‍රශ්නයක්.!"
තවත් දකුණු ආසියානු ආයෝජකයෙක් ඇමරිකානු ඩොලර් මිලියන 20 ක අපනයන සැකසුම් කලාපයක් සඳහා වූ ඔහුගේ යෝජනාව වසර දෙකක් තිස්සේ ඇණහිට ඇති ආකාරය විස්තර කළේය. ඔහු BOI වෙත ඉදිරිපත් කළ ව්‍යාපෘති ගොනුව තුන් වතාවක්ම BOI විසින් 'නැති කරගෙන' (lost) තිබිණ. "අපරාදේ, ඒ කාලය තුළ මට වියට්නාමයේ කර්මාන්තශාලා තුනක් පිහිටුවීමට හැකියාව තිබුණා" ඔහු පැවසීය.
කොළඹ ව්‍යාපාරික ප්‍රජාව තුළ කටකතා පැතිර යමින් ඇත්තේ ජ්‍යෙෂ්ඨ විධායක නිලධාරීන් ඇතුළු ඇතැම් ආයෝජන මණ්ඩල නිලධාරීන් හිතාමතාම ආයෝජකයින් කලකිරවීමට පත් කරමින් සහ ශ්‍රී ලංකාවේ වත්මන් ආණ්ඩුවට 'පාලනයක් ගෙන යා නොහැකි' බවට මතයක් ඇති කරමින් NPP රජය අපකීර්තියට පත් කිරීමට කටයුතු කරන බවයි.
ආයෝජන ප්‍රවර්ධන අමාත්‍යාංශයේ අභ්‍යන්තර ආරංචි මාර්ග චෝදනා කරන්නේ රේණුකා වීරකෝන් රාජපක්ෂ යුගයේ විවිධ ප්‍රතිලාභ ලැබූ තැනැත්තියක් වන අතර ඇය දැනටත් පොහොට්ටුවේ දේශපාලනඥයන්ට පක්ෂපාතී කොටස් සමඟ කපටි අන්දමින් සම්බන්ධතා පවත්වාගෙන යන බවයි.
එය සත්‍ය නම්, ඇයට ඇත්තේ නිලධාරිවාදී නොහැකියාව පමණක් නොවේ, ඇය කරන්නේ ආර්ථික කඩාකප්පල්කාරී ක්‍රියාවකි.
හානිය මැනිය හැකිය. 2025 මුල් මාස නවය තුළ පමණක්, BOI හි "ක්‍රියා පටිපාටි වල අංශභාගය" නිසා යෝජිත විදේශීය ව්‍යාපෘති 22 කට වැඩි ප්‍රමාණයක් ශ්‍රී ලංකාවෙන් ඉවත් වූ බව වාර්තා වේ. මැද පෙරදිග සහ නැගෙනහිර ආසියාවේ ඉහළ වටිනාකමක් ඇති ආයෝජකයින් කිහිප දෙනෙකු බංග්ලාදේශය සහ වියට්නාමය වෙත අවධානය යොමු කර ඇත.
ආයෝජන මණ්ඩලය සෑම වර්ෂයක දී ම කයිවාරු මාධ්‍ය සාකච්ඡා පවත්වයි. දිලිසෙන අත් පත්‍රිකා ප්‍රකාශයට පත් කරයි. "ඓතිහාසික ආයෝජන සාර්ථකත්වය" ගැන ප්‍රකාශ කරන වාර්ෂික වාර්තා නිකුත් කරයි. අධ්‍යක්ෂ ජනරාල්වරිය ගේ කතා සර්ව ශුභවාදී සහ ස්වයං-සුබ පැතුම් වලින් පිරී ඇත.
එහෙත් සංඛ්‍යා ලේඛන අඳුරු කතාවක් කියයි.
ආයතනය විදේශයන්හි "ආයෝජන ප්‍රවර්ධන" සංචාර සඳහා රුපියල් මිලියන ගණනක් වියදම් කරයි. බොහෝ විට සිංගප්පූරුව, ඩුබායි සහ ලන්ඩන් හි පිහිටි තරු පහේ හෝටල් වෙත ඔවුන්ගේ නියෝජිත කණ්ඩායම් ගමන් කරති. නමුත් පසුගිය වසර තුන තුළ ආයෝජන මණ්ඩලයේ පහසුකම් යටතේ එක මහා පරිමාණ ආයෝජකයෙකුවත් ශ්‍රී ලංකාවට ඇතුළු වී නැත.
එසේ පැමිණි ස්වල්ප දෙනෙකුට පවා ඉටු කළ නොහැකි නිලධාරිවාදී බාධක ජය ගැනීමට බල කෙරිණ. ඔවුහු ආයෝජන මණ්ඩලය සම්පූර්ණයෙන්ම මඟ හරිමින් රේඛීය අමාත්‍යාංශ හෝ කලාපීය බලධාරීන් සමඟ සෘජුවම පෞද්ගලික ගිවිසුම් කරා තල්ලු වූහ.
කෙටියෙන් කිවහොත්: ආයෝජන මණ්ඩලය තමන්ගේම පද්ධතිය තුළ පවා 'අදාළ නොවෙමින්' පවතී.
පෞද්ගලික අංශයේ ආයතනික විධායක නිලධාරීන් මෙන් නොව, BOI නිලධාරීන් ආයෝජන ප්‍රතිඵලවලට සම්බන්ධ කාර්ය සාධන ඇගයීමකට මුහුණ නොදේ.
* මේ වසරේ ඔබ කොපමණ ව්‍යාපෘති අනුමත කර තිබේද?
* ඇත්තටම කොපමණ ව්‍යාපෘති බිඳ වැටී තිබේද?
* ආයෝජකයින් කී දෙනෙක් ඉවත්ව ගොස් තිබේද?
කිසිවෙකු ඔවුන්ගෙන් අසන්නේ නැත.
BOI පෞද්ගලික අංශයේ සමාගමක් නම්, එය බොහෝ කලකට පෙර බංකොලොත් වී වැසී යාමට ඉඩ තිබුණි. නමුත් එය රාජ්‍ය ආයතනයක් නිසා, එහි අකාර්යක්ෂමතාව නොනැසී පවතී. බදු ගෙවන්නන් විසින් අරමුදල් සපයනු ලබන අතර නිලධාරිවාදය විසින් සාධාරණීකරණය කරනු ලැබේ.
දරාගත නොහැකි උත්ප්‍රාසය නම්, විදේශීය ආයෝජකයින් ආකර්ෂණය කර ගැනීමේ කාර්යය පැවරී ඇති පුද්ගලයින්ම ජීවත් වන්නේ ආයෝජන වල ලාභයකින් නොව මහජනතාව විසින් බදු ලෙස ගෙවනු ලබන වැටුප් මත ය.
යමෙක් තම වගකීම් ඉටු කිරීමට අපොහොසත් වුවහොත්, ඔහු වෙනුවට වෙනත් දක්ෂයෙක් පත් කළ යුතුය. ව්‍යාපාරික හෝ ඕනෑම ආයතනයක් පාලනය තුළ වගවීම ක්‍රියාත්මක වන්නේ එලෙස ය. BOI වෙත එය අදාල වී නැත.
ආර්ථික විශ්ලේෂකයින් දැන් යෝජනා කරන්නේ රජය BOI වෙත දින 90 ක කාර්ය සාධනය පෙන්වීමේ නියෝගයක් නිකුත් කළ යුතු බවයි.
එම කාලය තුළ, ආයතනයේ ප්‍රතිඵල පෙන්නුම් කළ යුතුය. අවම වශයෙන් ඇමරිකානු ඩොලර් බිලියන 5 ක හෝ ආයෝජන ව්‍යාපෘති ගිවිසුම් අත්සන් කර පෙන්විය යුතු ය.
එය අසාර්ථක වුවහොත්, අධ්‍යක්ෂ ජනරාල්වරිය සහ ඇගේ ජ්‍යෙෂ්ඨ කණ්ඩායම සේවයෙන් පහ කළ යුතු අතර, ජාත්‍යන්තර අත්දැකීම් සහිත වෘත්තිකයන්ගෙන් සමන්විත පෞද්ගලික-රාජ්‍ය දෙමුහුන් ආයෝජන අධිකාරියක් බවට BOI ප්‍රතිව්‍යුහගත කළ යුතුය.
ශ්‍රී ලංකාවට තම ආර්ථික පුනර්ජීවනය නිලධාරිවාදී නොහැකියාවට ප්‍රාණ ඇපයට තබා ගැනීමට ඉඩ දිය නොහැකිය.
ශ්‍රී ලංකාවේ කලාපීය අසල්වැසියෝ වටිනා පාඩම් කියා දෙති.
* වියට්නාමය:
සියලුම විදේශ ආයෝජන අයදුම්පත් ඩිජිටල් තනි කවුළු වේදිකාවක් හරහා සකසනු ලැබේ. සංවේදී නොවන අංශ සඳහා අනුමැතිය ලබා ගැනීමට යන්නේ පැය 72 කට වඩා අඩු කාලයකි.
* බංග්ලාදේශය:
බංග්ලාදේශ ආයෝජන සංවර්ධන අධිකාරිය (BIDA) මාර්ගගත ලියාපදිංචිය හඳුන්වා දුන් අතර, ආයෝජකයින්ට දුරස්ථව සිට ක්‍රියා පටිපාටි සම්පූර්ණ කිරීමට ඉඩ සලසයි.
* කාම්බෝජය:
සරල කළ ඉඩම් බදු දීම සහ බදු දිරිගැන්වීම් මගින්, කලක් ශ්‍රී ලංකාව සිය ඇඟලුම් සහ නිෂ්පාදන සඳහා රට ලෙස සැලකූ ආයෝජකයින් තමන්ට ආකර්ෂණය කර ගත්තේය.
* පකිස්ථානය:
දේශපාලන කැළඹීම් තිබියදීත්, එය වේගවත් අනුමැතියක් සහිත “විශේෂ ආර්ථික කලාප” ස්ථාපිත කළේය.
* ඩුබායි:
ව්‍යාපාරික වීසා පැය 24 ක් ඇතුළත සහ කාර්මික බලපත්‍ර පැය 48 ක් ඇතුළත සකසනු ලැබේ.
මේ අතර, ශ්‍රී ලංකාවේ ආයෝජන මණ්ඩල නිලධාරීහු තවමත් විදේශ ගමන් බලපත්‍රවල 'ඡායා පිටපත්' සහ 'හැඳින්වීමේ චරිත සහතික ලිපි' ආයෝජකයන්ගෙන් ඉල්ලා සිටිති.
මෙය අකාර්යක්ෂමතාවයක් පමණක් නොවේ; මෙය ආර්ථික සියදිවි නසා ගැනීමකි.
ආයෝජකයින් අනුමැතිය සඳහා වසර ගණනාවක් බලා සිටින නමුත්, ආයෝජන මණ්ඩල නිලධාරීන් පෞද්ගලික අංශයේ විධායක නිලධාරීන්ට නොපරදින සුපිරි රාජ්‍ය වාහන, නිවාස දීමනා සහ ජාත්‍යන්තර සංචාරක වියදම් ඇතුළු වරප්‍රසාද භුක්ති විඳිති.
ලංකා-ඊ-නිව්ස් විසින් සමාලෝචනය කරන ලද අභ්‍යන්තර ලේඛනවලින් හෙළි වන්නේ 2024 දී පමණක් ආයෝජන මණ්ඩල නිලධාරීන් සඳහා විදේශ ප්‍රවර්ධන කටයුතු වෙනුවෙන් රුපියල් මිලියන 350 කට වඩා වියදම් කළ නමුත්, ඉන් බොහොමයක් "සෘජු ආයෝජන බිංදුවක් වූ ප්‍රවර්ධන" බවයි.
ජ්‍යෙෂ්ඨ නිලධාරීන්ට නම්, “ප්‍රවර්ධනයම ආයෝජනයක්” වී තිබේ.
සංඛ්‍යාලේඛන පිටුපසින් සිටින්නේ සැබෑ වින්දිතයින් වූ ශ්‍රී ලාංකික ජනතාවයි.
අසාර්ථක වන සෑම විදේශීය ව්‍යාපෘතියකින්ම අදහස් වන්නේ රැකියා අහිමි වීම, අපනයන අහිමි වීම සහ ආදායම අහිමි වීමයි. සෑම ප්‍රමාදයකින්ම රටේ මාස ගණනක ප්‍රගතිය අහිමි වේ.
ආයෝජන මණ්ඩලය විසින් කර්මාන්ත ශාලාවක් ප්‍රමාද කරන විට, ඉන් දුක් විඳින්නේ ආයෝජකයා පමණක් නොවේ. ආදායමක් අහිමි වන පවුලක්, සංවර්ධනය අහිමි වන කලාපයක් සහ විශ්වසනීයත්වය අහිමි වන ජාතියක් ඉන් දුක් විඳිති.
1978 දී ආර්ථික ලිබරල්කරණයේ කුළුණක් ලෙස ආයෝජන මණ්ඩලය නිර්මාණය කරන ලද නමුත් අද වසර හතළිස් හතකට පසු, එය එකතැන පල්වීමේ සංකේතය බවට පත්ව ඇත.
ආයෝජන මණ්ඩලය වගකිව යුත්තෙක් බවට කිසිවෙකු චෝදනා නොකරන්නේ ඇයි? දේශපාලන ආරක්ෂාව යටතේ ආයෝජන මණ්ඩලය ක්‍රියාත්මක වන බැවිනි. ආයෝජන මණ්ඩලය ආර්ථික එන්ජිමක් ලෙස නොව රාජ්‍ය තාන්ත්‍රික උපාංගයක් ලෙස සලකන අමාත්‍යවරුන් විසින් එහි ඉහළ නිලධාරීන්ව ආරක්ෂා කරනු ලැබේ.
සෑම රජයක්ම විදේශ සංචාර සහ ආයෝජන සමුළු වල 'ඡායාරූප කයිවාරුවක්' ලෙස ආයෝජන මණ්ඩලය භාවිතා කරයි. ගනුදෙනු බිඳ වැටෙන විට, සෑම කෙනෙකුම නිහඬව “බාහිර සාධක” වලට දොස් පවරති.
ආයෝජන මණ්ඩලය එහි මූලික මෙහෙවර වන ආයෝජන පහසුකම් සැලසීමේදී අසමත් වී ඇතැයි යන ගැඹුරු සත්‍යයට මුහුණ දීමට කිසිවෙකු එඩිතර වන්නේ නැත.
ආයෝජන මණ්ඩලය ප්‍රතිසංස්කරණය කිරීම තවමත් කළ හැකි නමුත් එය සිදුකළ හැක්කේ රැඩිකල් ප්‍රතිව්‍යුහගත කිරීමක් හරහා පමණක් බව විශේෂඥයින්ගේ මතය යි.
* ඩිජිටල්කරණය;
සියලුම අයදුම්පත් සහ අනුමත කිරීමේ ක්‍රියාවලීන් මාර්ගගත ඩිජිටල් ක්‍රමයකට ගෙනඒම.
* කාර්ය සාධනය මත පදනම් වූ කොන්ත්‍රාත්තු;
නිලධාරීන්ගේ වැටුප් සහ උසස්වීම් සැබෑ ලෙස ඔවුන් දායක වූ ඍජු විදේශ ආයෝජනයන්හි ප්‍රතිඵලවලට සම්බන්ධ කළ යුතු ය.
* ස්වාධීන අධීක්ෂණය;
ව්‍යාපෘති ප්‍රමාදයන් සහ ප්‍රතික්ෂේප කිරීම් නිරීක්ෂණය කිරීම සඳහා බාහිර විගණන කණ්ඩායමක් ස්ථාපිත කළ යුතු ය.
* ජාත්‍යන්තර බඳවා ගැනීම්;
පෞද්ගලික අංශයේ ආයෝජන පසුබිම් සහිත වෘත්තිකයන් බඳවා ගත යුතු ය.
* විනිවිදභාවය;
අපේක්ෂිත, අනුමත සහ ප්‍රතික්ෂේප කරන ලද ව්‍යාපෘතිවල කාර්තුමය යාවත්කාලීන කිරීම් ප්‍රකාශයට පත් කළ යුතු ය.
ආයෝජන මණ්ඩලයට ප්‍රතිසංස්කරණය කළ නොහැකි නම්, එය ප්‍රතිස්ථාපනය කළ යුතුය. රාජ්‍ය සහ පෞද්ගලික පාලනය යන දෙකම සහිත නව "ජාතික ආයෝජන අධිකාරියක්" National Investment Authority (NIA) ශ්‍රී ලංකාවේ එකම බලාපොරොත්තුව විය හැකිය.
සටන් පාඨ අරමුණු සහ උපාය මාර්ග ගැන නිදහසට කරුණු කීමේ එකම චක්‍රයක ආයෝජන මණ්ඩලය සිරවී සිටී.
අධ්‍යක්ෂ ජනරාල්වරිය දැන් අපගේ මූලික ප්‍රශ්න තුනකට පිළිතුරු දිය යුතුය:
1. ඔබේ ධුර කාලය තුළ ආයෝජන කීයක් අනුමත කර තිබේ ද?
2. නිලධාරී ප්‍රමාදයන් නිසා ආයෝජකයින් කී දෙනෙක් ඉවත් වී ගොස් තිබේ ද?
3. විනිවිදභාවය සහ කාර්යක්ෂමතාව වැඩි දියුණු කිරීම සඳහා ඔබ ගෙන ඇති තිරසාර පියවර මොනවාද?
මේවාට පිළිතුරු නොලැබෙන්නේ නම්, ඇය ගෞරවනීයව ඉල්ලා අස්විය යුතුය.
කිසි විටෙකත් නිලධාරීන්ගේ කෞතුකාගාරයක් වීමට ආයෝජන මණ්ඩලය පිහිටැවූයේ නැත. එය ශ්‍රී ලංකාවේ ආර්ථික අනාගතයේ හෘද ස්පන්දනය වීම උදෙසා පිහිටවුන ලද්දකි.
ඒ හෘද ස්පන්දනය වෙත නැවත ලඟාවීමට කාලයයි.
එය ඉටුකළ නොහැකි නම් රේණුකා වීරකෝන් සහ ඇගේ කණ්ඩායම ඉවත් විය යුතු ම ය. තවත් අත්සනක්, තවත් ගොනුවක් හෝ වෙනත් නිදහසට කරුණක් සඳහා ශ්‍රී ලංකාවට තවත් දශකයක් කල් බලා සිටිය නොහැකි ය.
රටට අවශ්‍යවන්නේ ආයෝජකයින් මිස නිලධාරීන් නොවේ. ජනතාවට අවශ්‍ය වන්නේ ප්‍රතිඵල මිස මාධ්‍ය සාකච්ඡා නොවේ.
ඉදිරි සති කිහිපය තුළ ලංකා-ඊ-නිව්ස් විසින් ආයෝජන මණ්ඩලයේ හැසිරීම නිරීක්ෂණය කිරීම සහ පවතින සියලුම ලේඛන, සන්නිවේදනයන් සහ ආයෝජක සාක්ෂි ප්‍රකාශයට පත් කිරීමට කටයුතු කරනු ඇත.
මක්නිසාද යත්, සියල්ලට පසු, වගවීම ආරම්භ වන්නේ හෙළිදරව් කිරීමෙන් නිසා ය.
(ලංකා ඊ නිව්ස් ඉංග්‍රීසි සංස්කරණයේ පල වූ වාර්තාවක් සිංහලට නැගුවේ -චන්ද්‍රප්‍රදීප් )
---------------------------
by (2025-10-21 04:56:07)
Read 22668 Times
Leave a Reply
0 discussion on this news
අජිත් ගලප්පත්තිගේ සිනමා විචාර එකතුව
අතීතයෙන් පාඩමක් - විශේෂඥ වෛද්‍ය අජිත් අමරසිංහ ලිපි