ගණේමුල්ල සංජීව ඝාතනයේ සැකකාරිය සෙවීමට පොලිසිය මහජන සහාය පතයි.!

(ලංකා ඊ නිව්ස් -2025.පෙබ.20, ප.ව.11.30) සංවිධානාත්මක අපරාධ කල්ලි නායකයෙකු වන සංජීව කුමාර සමරරත්න හෙවත් ගණේමුල්ල සංජීව ඝාතනය කිරීම සඳහා වෙඩික්කරුට ආධාර අනුබල ලබා දුන් සැකකාර කාන්තාවක් හඳුනා ගැනීම සඳහා පොලිසිය මහජන සහාය පතයි.

ඊයේ (19) කෙසෙල්වත්ත පොලිස් වසමේ අලුත් කඩේ අංක 05 මහේස්ත්‍රාත් අධිකරණය තුළ දී මෙම වෙඩි තැබීම සිදුවූ අතර ගණේමුල්ල සංජීව ඝාතනය කිරීම සඳහා වෙඩික්කරුට ගිනිඅවිය රැගෙන විත් ඇත්තේ මෙම සැකකාරිය බව හෙළි වී තිබේ. ඇය ද නීතිඥවරියක ලෙස වෙස්වලාගෙන පැමිණ ඇත.

වෙඩි තැබීමෙන් පසු සැකකාරිය පලාගොස් ඇති නමුත් මේ වන තෙක් ඇය සොයා ගැනීමට හැකි වී නැති බව සඳහන් වේ.

පිංපුර දේවගේ ඉෂාරා සෙව්වන්දි වන ඇය අවුරුදු 25 ක තැනැත්තියක වන අතර ඇය 243/01, මීගමුව පාර, ජය මාවත, කටුවැල්ලේගම ප්‍රදේශයේ පදිංචිකාරියක් බව සඳහන් වේ.

සැකකාරිය සම්බන්ධයෙන් යම් තොරතුරක් වෙතොත් 0718591727 – අධ්‍යක්ෂ, කොළඹ අපරාධ කොට්ඨාසයට හෝ 0718591735 ස්ථානාධිපති, කොළඹ අපරාධ කොට්ඨාසයට දැනුම් දෙන ලෙස පොලිසිය වැඩිදුරටත් ඉල්ලා සිටී.

ඉහත කී ඉෂාරා සෙව්වන්දි සමග දුරකථනයෙන් සම්බන්ධතා පැවැත්වූ පොලිස් කොස්තාපල් වරයෙකු අද අත් අඩංගුවට ගෙන තිබිණ. එකී පොලිස් නිලධාරියා මීගමුව පොලිසියේ අපරාධ අංශයේ උසාවි රාජකාරි කළ අයෙකි. අවුරුදු 25 ක් වන ඔහු පාදෙණිය ප්‍රදේශයේ පදිංචිකරුවෙකි.

---------------------------
by     (2025-02-20 20:23:26)

Read 18042 Times

Leave a Reply

  0 discussion on this news